Maranao Version:
A. SO PAKAASAL A MA'AHAD ABDULHAMID AL ISLAMIE INC.
Aya paka asal a ngaran angkae Ma'ahad Abdulhamid Al Islamie na sii ko paganay na aya ngaran iyan na giya Madrasatul Da-rul Arqam. So manga morit na sii siran gii mamangadi ko mayto a Masjid a tampar sa basak a khipamomolaan sa manga ilaw milelemba sa Bazagad , Baloi Lanao Del Norte,a pimbalay o manga tonganay ami a pagoolowanan siran o manga bapaami sa tenged minsan asi Bapa Ali Sindawan tenged minsan o Ama ami ago si Bapa Nasroding Lope (Black Tiger) a tenged minsan o Ina ami. Go so tenged ami makadowa ko ina ami a si Saeed Lope..
Sii ko kiyabangon o bago a building a lima ka kuwarto a sii miyambalay ko lupa o ama ami a si Abdulhamid Anarig na siyambian ami sa ngaran so Madrasatul Da-rul Arqam sa Madrasa Al Abdulhamid Al Islamie sii ko paganay ogaid na so kiya clasiron sa mala a grado na giyoto i kiya ingaraniron sa Ma'ahad Abdulhamid Al Islamie.
Ika dowa na sekami a manga mori a tao niyan a familya Abdulhamid i miroromasay, minggasto, miyawid a akal ago mithandingan sangkae a Madrasa a miyadaorog kamiron o manga brother in-law ami lagid i Hadji Ansary Pandapatan ago si Hadji Nasroding Mapandi, go so manga wiya ami , so manga tonganay a manga sisipeg a gii a maki pagawida rekami.
Ika telo a kini ingaranen amiron ko ama ami na pembaal kami a Familya sa PANINGGALAN A PAZA ka ba kalo kalo na ba rawaten o phamangi salimbago a managontaman siran mambo sii ko kapakambaal sa kamapiyaan a para ko inged go so phaginged na samporna ko agama tano a agama Islam.
Ika pat na anami mipatoray ko ginawami a so pekhasokat ami na mimbalingan ami ko inged ami a gii kanggonaan o madakel a tao go so inged na aya kalaanon so agama tano a agama Islam.
B. KIYASABAPAN SA KIYABANGON A MAAHAD ABDULHAMID AL ISLAMIE
Si ko ragon a 2006 a olanolan a September na mimbakasyon ako sa Filipinas a phoon ako sa Paris, France- Europe. Na somiyong raken so tenged ami minsan a si Ustadha Salma Palo na pitharo iyan raken a pithataginep iyan kon a rakes a phangarororo a lo iyan ambangon kami kon sa Madrasa.
Sangkoto a masa a kiyabaling aken na tanto a mala a pembayadan aken a utang ka miyakapangotang ako sabap ko kapdi. Miyalalong ako o manga palalalong sa Internet a aya kadakel iyan a pirak na 1.2 million pesos. Sa matas a thotholanon. Sa mapanothol aken bo sii ko manga ped a gawii. Ika dowa na giyoto i petharoon a manenegative ako ko bangko aken sa Paris sabap ko kadakel a pembayadan aken. So den so kiyaaloya niyan raken sambangon kami kon sa Madrasa na kiyaalgan ako a kala sabap sa katawan o Allah so mambebetad aken. Aya katao iranon na kagiya gomagalebek ta sa Europe na bata tiyamotamok takinoba bes ka milelebeng a utang. Ogaid na makimpen giyoto i mambebetad aken na dakoden mambo kasipati sa aya miyatharo aken na Insha Allah imanto den na panawagingka so manga tenged ka minsan a manga pagariyaken na tharoangka kiran a zong tano sa Bazagad si ko lupa o ama ami a pamomolaan sa manga niyog kambangon tano roo sa Madrasa.
Somiyong kami ki Hadja Anisa a pagariyaken a mithatapi i Hadji Ansary Pandapatan ka makaperaraniya so walay ami ago so walayran a sii milelemba sa Zapacan Baloi, Lanao Del Norte. Sangkoto a walay ami a pembethowan ami sa Abdulhamid Compound na roo pen milelemba so Radio Station tano sa Baloi. Miyaphanon ami ron so plano a kambangon sa Madrasa. Taros a miyangawid kami sii ko manga sekhad a kayo a kinowami ko manga kayo iran ka sa masa oto na gii siran mbalay ka pesompatan iran so walayran. Miyamakaoma mambo so dowa katao a manga lakiyami a si Engineer Habib go si Engineer Zayton, Go mipagepeda iran pen so Kaka rekami a Bae a Labi sa Bazagad a si Hadja Nasriya Abdulhamid Mapandi. Taros a somiyong kami sa Bazagad. Da mathay a kiyapakaoma mi sangkoto a lupa ambangonan ami sa Madrasa na miyaka talingoma mambo so babo ami a si Ustadha Rohana Mahdi (Tauday) a miyaona a principal sa Maahad Abdulaziz Al Islamie.
Aya kalami lami na igira a ipsekhad ami so kayo ko lupa a tamana o pembalayn ami a Madrasa na batiyaan amiron so ingaran o Kadnan a so Bismillaahir Rahmaanir Raheem. Na go baden pakabelanga o kaka rekami a Bae a labi sa Bazagad ka tanto niyan a piyakala ka kokoma lima ka kuwarto na miyaka sagina so tengedami minsan a si Ustadha Salma Palo sa tigiyan ''Mataan mambo si Bae a Labi ka tanto niyan a piyakala''. Sa masa oto na tanto kami a masosonor a khikaalgan a kala sabap sa kapembalay ami sa Madrasa a di ami katawan o anda phakapoon so rizki o Allah. Na aya inisembagon i Bae a Labi sa Bazagad na ''Ba seketano i pembalayron, so ALLAH i pembalayron, maghaga tano, ka batano ini manga Milyonaryo''.
Oriyan o kiyapaka pasad ami manekhad na mimomosawira kami o antonaa i zowaanami. Miyaka mosawer si Hadja Anisa a miyaaloy niyan a si darodopa iyan a si Hadji Ansary Pandapatan na pha sidqah sa dowa ka Damn Truck a pethad. Aya miya tharo aken na so sakenon na katawan o Allah so maoolaola ko ogaid na tepengan aken so Bangko aken sa Paris, France o bakoron maka utang. Somong kami sa Iligan ki Habib na omaka kowa kami sa Pirak ko bangko aken sa Paris na tawagan aken sekano na sono a kami niyo a rakes o multi cab iyo ka mamamasaan tano sa manga potao kayo ago cemento .
Miya soti soti so Allah a malai limo ka asar a tolos ikhlas so niat ka na daa baon impossible.
So kini sanggaren aken ko Visa Card aken sii ko machine taros a inisorat aken so secret code number rakes o kiyabatiyaako ko ingaran o Allah sa pangniron sa makakowa kami sa pirak na .alhamdo lillah baden minibombor so pirak sa minibegay raken langon so kadakel a piyangni aken a pirak. Tanto ako a miyabayabaya na taros a phi telephono wan aken si Hadja Anisa na da mathay na miyakaoma a ped iyan so wata iyan a si Mahmod a pin driver ran iyan so truck iran. Sa khagabi den mambo oto a masa. So kiya pakapamasami ko langowan a kailangan ami a para i pembalay sa Madrasa na so kiya pita iyan na miyaki ogop kami sangkoto a tengedami a si Saeed Lope a ogopan kami niyan sii ko manga galebekon. Sopen so manga morit go so manga pakiwataan ami na ped pen a miyakaogop. Miyanageb so manga morit sa ig sii sa agos a para imbonao ko cemento. Na sekami den i minggalebek sa somiyokay kami sa sakatao a panday a phagogopan ami. Sa ayabo a miyaghagami na miyapaka tindegami so manga polaosiyan.
Tanto a miyakandarasag a pamikiran ami sa kapipikirami o andakami khowa sa finance a para i pembalay ami sa Madrasa. Aya paganay a miyapikir ami na phamangni kami sa tabang ko manga Datu, na somiyong kami sii ko misiminar sa Marawi na miyakitabang kami ko isa ko manga datu roo na mi promise a tabang ogaid na na miyakapira kami roo makasong sa ofisina niyan na da niyan bo tomana sa ba kami baden mizabar.
So kakhasoy aken sa Paris na tiyadiyam aken so manga pakiwataanami sa kapamagidaida a idaida a basa Meranao rakes a ini recordami. Sa so manga pagariyaken na aya kalaanon na so lakiyami a si Engineer Habib na miyogop siran. Sekaniyan i min director ago mi piano ago videographer. Giyoto i pembasaan a baden telo telo gawii a ininggalebek amiron ka madi lapet ka magendod ako sa Paris, France. Inawidan aken so original a CD a ini recordami a manga idaida na so kiyapaka omami sa Manila a ped aken so isa ko manga lakiyami a si Engineer Zayton Abdul- hamid ka inidolog ako niyan sa Manila na piyaki copyami so CD sa madakel na taros a inipamgay ami ko manga bolayoka ago manga tonganay sa Manila sa arap ami sa ansiran makatabang ko Madrasa a pembangonen ami. Aya saghaga a miyatharo iran na miyaka panalamat siran ogaid na tiyaalik iran so tabang iran sa aya kimbegan iranon na sii ko kaipos o December ka pendagang siran pasi. Inibgay aken kiran so address i Hadja Anisa a isa ko manga pagariyaken ago so telephone number iyan. So ped ko manga CD na inibegay aken ki Engineer Zayton para iphamegay ko manga tonganay sa Baloi na so ped iyan na inawidan aken sa Paris a para sii ko manga bolayoka aken. Alhamdo lillah maloden oto miyakatabang.
So peman so kiyapakauma ko sa Paris na ini pamegay aken ko manga bolayoka aken so CD na miyamanabang siran mambo na taros a inipakawit aken sa inged. Miyaaloy raken pen o pagariyami a Bae a labi sa Bazagad a so miyaona a Mayor sa Marawi city a si Solitario Ali phangninta ko Allah a baden pekhalendo a Omor iyan na minithoona iran sa Banggolo,Marawi City na miyaphanon iyanon so kambangonami sa Madrasa na daden dowadowa na migay sa cheque a aya tago iyan na 15,000.00 pesos na ini begay niyan taros a pitharo iyan a opama ka giyanan ambangonen iyo a Madrasa na matatago sa Lanao Del Sur na mala a khitabang rekano ogaid na kagiya sii anan matatago sa Lanao Del Norte na kenaba ami sakop. Giyangkanan a pirak a ini begay aken na personal aken anan a pirak. Subhaanalla, limoon seka niyan o Allah ka miyaka tompok ko pabrica a amal a penggaling sa dayon sa dayon.
Ayabo a miyaapas ami sii ko miyakadowa ragon na asara a kiya atpan na diden mapepeta a gii ron ka pangadii o manga morit. Si Hadji Nasrodden Mapandi a mithatapi o kaka rekami a Bae a labi sa Bazagad a si Hadja Nasria Abdulhamid Mapandi na so kiyambakasyon iyan a phoon sa Saudi na sekaniyan peman i miyakapago- lowan sa kiyatago iron sa atep sa misangan-sangan kami a magari-ari ago giyangkae a pagariami a ped aken sii sa France a si Zenaida Abdulhamid sa miya megay kami sa pirak a para ini pamasa sa atep. Sa miyangalimo bo so Allah sa miyaapas ami a sii ko soled o saragon na miyacompleto sa kiyatagoan sa manga keleb ago miya pintal.
Salakao sii pen sangkae a gii amimbalayn a Madrasa na miaki ogop kami sa TADHAMON A pagoolowanan i Abdulwahab a sii milelemba sa Marawi City.Siran so sasarigan o manga Arab sa Bahrain sii ko manga panabang iran a para ipembalay sa Masjid ago Madrasa . Limo o Allah a bigan kamiran ko manga panabang o manga Arab. Sa miyambalay so Masjid ago dowa ka kuwarto a para ko manga Torel a phalangag sa Qur-an. Alhamdo lillah sii ko manga limo iyan.
Sii peman ko miyamakapira olan a kiya completo o paganay a building na miyapikir i Hadji Ansary Pandapatan a mithatapi o pagariyaken a si Hadja Anisa a phasidqah siran andarodopa sa isa ka building mambo a para sii ko manga morit ka miyakadakel a gii mangadi. Sabap ko kiya rizki i kiran o Allah sa madakel a rizki na ini toman iran so matatago sa pamikiran iran a kapembalayran sa isaka building a kokoma limaka kowarto mambo a donation iran sa Ma'ahad Abdulhamid Al Islamie. Miyakaogop mambo angkae a organization ami sii sa Paris, France a giya Bangsa Moro Community in France sii ko manga ped a ontoda ka mi sidqah siran sa dowa polonggibo a pesos para iphamamasaan sa manga ontoda.
So peman so Masjid a biyangon a TADHAMON na sabap sa daa bawon darpa o manga bae na miyamegay kami a magari-ari sa zasapolonggibo ago miyakaogop pen so President ami sa Bangsa Moro Community in France a si Yusoph Abdulmajid sa labi sapolonggibo ko kiya tago iron sa puro a para darpa o manga bae. So manga light a inisindao sii ko Masjid na sondarodopa a si Hadji Ansary ago si Hadja Anisa i minggastoron sa madadaorog siran o dowa katao a manga lakiyami a manga Engineer a si Engineer Habib ago si Engineer Zayton Abdulhamid sii ko manga galebekon ko kiyapanago iron sa light.
Sii ko ragon a 2010 na miyaplano peman ondarodopa a si Hadji Ansary Pandapatan ago si Hadja Anisa Abdulhamid Pandapatan a Financer angkae a Maahad Abdulhamid Al Islamie a kapembalayran sa Social Hall angkae a Madrasa ago igira adena manga seminar na ron pekhi lemba.Alhamdo lillah tiyawfiqan siran peman o Kadnan sa miyambalayran angkoto a Social Hall. Go siran pen i minggasto sa kiya alad angkae a Madrasa.
Aya peman a masosowa o giiron kapangadii na so manga morit a giiron mamangadi na libri sabap sa katawan ami a kadaklan ko manga morit na so manga lokes iran na tharoon ta i benar na maregen so kakhawiyagan na diran khagaga so imbayad o manga wata iran. Sa miyazangan-sangan ami peman a magari-ari so izokay ko manga Guro. Aya pzokayan ami a manga Guro na sapolo ago telo.sabap sa miyaka dakel so manga morit ka minirampay sa labi telo gatos a morit. So sekamiron a magari a matatago sa France na nem katao a guro a masasangan amiron a pzokayan ami na so manga ped a guro na masasangan angkae a manga ped a pagariyami a matatago sa inged ago so manga pakiwataan,manga tenged minsan, manga tonganay, manga bolayoka a phagogop ko pabrika a amal a penggaling sa dayon sa dayon.Giya pen angkae a Bangsa Moro Community in France na pethabang siran pen ko sokay o manga Guro.Giya pen angkae a employer aken a gagalebekan aken sii sa France na igira a kiya terangan na pembegay sa sadqah a para ipagoman ko ipsokay ko manga guro. So sekamiron peman a magari a matatago sii sa France na siyangan ami so FM Radio Station a iningaranan ami sa DXRZ a piyakipamasami ko Ariyami a Engineer a si Habib so miyaaloy niyan rekami a gopen miniyoma a FM Radio Station a phoon sa Japan. Sa siiden milelemba sangkoto a babangonan sa Madrasa sa Bazagad Baloi Lanao Del Norte sii ko walay o Principal sangkoto a Madrasa a si Ustadha Salma Palo.Sii ko dowa polo ago pat ka oras na phagandar. Sa aya pakatotokarenon na kapangadi sa Qur'an go igira aden a seminar sangkoto a Madrasami na live sa Radio Station ka i pha remote angkoto a lakiyami a manager ko dowa a Radio Station a isawon so DXCM a milelemba sa Zapacan Baloi sii sa Abdulhamid Compound giyanan so andang a FM tano sa Baloi a inaden angkae a ariyami a si Engineer Habib na ikadowa giyangkae a DXRZ a inaden ami.
Author:
HADJAH RAHMA TAUDAY (MAHDI) ABDULHAMID ANARIG
Paris, France, Europe
Total number of the country that visited this site since September 25, 2012
For the comments and suggestions click the following link
http://mahadabdulhamidalislamieinc.weebly.com/2/post/2011/10/welcome-to-our-new-website.html#comments
http://mahadabdulhamidalislamieinc.weebly.com/2/post/2011/10/welcome-to-our-new-website.html#comments